2021 წლის 17 დეკემბერს რუსეთის საგარეო საქმეთა სამინისტრომ გამოაქვეყნა დოკუმენტი, რომლითაც NATO-ს და აშშ-ს უსაფრთხოების გარანტიებს სთხოვს და კონკრეტულ პირობებსაც აყენებს.
რუსეთი ნატოს შემდგომი გაფართოების და უკრაინასთან ალიანსის გამორიცხვას ითხოვს. ასევე, მოითხოვს, NATO-ს ჯარები 1997 წლის მაისის განლაგებას დაუბრუნდნენ, ანუ იმ პოზიციებზე დაბრუნდნენ, სანამ ალიანსში აღმოსავლეთ ევროპის ქვეყნებს მიიღებდნენ.
ასევე, რუსეთი აშშ-ს მიმართავს, არ შექმნას სამხედრო ბაზები პოსტსაბჭოთა ქვეყნებში, არ გამოიყენოს მათი სამხედრო ინფრასტრუქტურა და არ განავითაროს მათთან სამხედრო თანამშრომლობა.
რუსეთის მიერ გამოქვეყნებულ დოკუმენტში NATO-ს მიემართება შემდეგი პირობები:
- გამოირიცხოს ნატოს შემდგომი გაფართოება და ალიანსში უკრაინის გაწევრიანება, ისევე, როგორც სხვა ქვეყნების;
- არ განთავსდეს NATO-ს დამატებითი ჯარები და შეიარაღება იმ ქვეყნებს მიღმა, სადაც ისინი 1997 წლის მაისში, აღმოსავლეთ ევროპის ქვეყნების ალიანსში გაწევრიანებამდე იყვნენ განლაგებულები, გარდა გამონაკლისი შემთხვევებისა, რომელიც მოხდება რუსეთისა და ნატოს წევრების თანხმობით;
- უარი თქვას NATO-ს ნებისმიერ სამხედრო საქმიანობაზე უკრაინაში, აღმოსავლეთ ევროპაში, ამიერკავკასიასა და ცენტრალურ აზიაში;
- არ განათავსონ საშუალო და მოკლე რადიუსის რაკეტები იქ, საიდანაც მათ შეუძლიათ მეორე მხარის ტერიტორიაზე დარტყმა;
- შეთანხმებულ სასაზღვრო ზონაში არ ჩაატაროს ბრიგადაზე მეტის წვრთნები და სხვა მოქმედებები და რეგულარულად გაცვალოს ინფორმაცია სამხედრო სწავლებების შესახებ;
- დაადასტურონ, რომ მხარეები ერთმანეთს არ თვლიან მოწინააღმდეგეებად, უზრუნველყონ თანხმობა ყველა დავის მშვიდობიანი გზით გადასაჭრელად და თავი შეიკავონ ძალის გამოყენებისგან;
- აიღონ ვალდებულება, რომ არ შექმნიან პირობებს, რაც შეიძლება მეორე მხარის მიერ საფრთხედ აღიქმებოდეს;
- შეიქმნას ცხელი ხაზი სასწრაფო კონტაქტისთვის;
რაც შეეხება პირობებს, რომლებიც აშშ-ს მიემართება, შემდეგია:
- არ განათავსოს იარაღი და ძალები იმ რეგიონებში, სადაც ეს მეორე მხარის მიერ ეროვნული უსაფრთხოების საფრთხედ აღიქმება;
- თავი შეიკავონ ბირთვული და არაბირთვული მძიმე ბომბდამშენების ფრენისგან თავისი ქვეყნის ცის გარეთ, მათ შეუძლიათ სამიზნე გაანადგურონ სხვა ქვეყნის ტერიტორიაზე.
- თავი შეიკავონ სამხედრო გემების ყოფნისგან მათი ქვეყნის ტერიტორიულ წყლებს მიღმა, საიდანაც შეუძლიათ, დაარტყან სამიზნეს სხვა ქვეყნის ტერიტორიაზე.
- არ განთავსდეს საშუალო და მცირე მანძილის რაკეტები საზღვრებს გარეთ და იმ რაიონებში, საიდანაც მათ შეეძლებათ მეორე მხარის ტერიტორიაზე სამიზნეებზე დარტყმა;
- თავი შეიკავონ ბირთვული იარაღის განლაგებისგან თავისი ქვეყნის გარეთ, ასევე, დააბრუნონ სხვა ქვეყანებში უკვე განლაგებული ბირთვული იარაღი და გააუქმონ ბირთვული იარაღის განლაგების ინფრასტრუქტურა;
- არ ჩატარდეს სამხედრო სწავლებები ბირთვული იარაღის გამოყენების სცენარით და არ მოხდეს არაბირთვული ქვეყნების ბირთვული იარაღის გამოყენებისთვის მომზადება;
- შეერთებული შტატებმა დადოს პირობა, რომ გამორიცხავს NATO-ს შემდგომ გაფართოებას აღმოსავლეთით და უარს იტყვის პოსტსაბჭოთა ქვეყნების ალიანსში მიღებაზე;
- ამერიკის შეერთებული შტატები იღებს ვალდებულებას, არ შექმნას სამხედრო ბაზები პოსტსაბჭოთა ქვეყნებში, არ გამოიყენოს მათი სამხედრო ინფრასტრუქტურა და არ განავითაროს მათთან სამხედრო თანამშრომლობა.
რუსეთი დოკუმენტზე ნატოს წევრი ქვეყნების ხელმოწერებს ელის.
დახურვა